Претходно
Што претставува алкалната диета и дали навистина функционира?
Денес постојат толку многу диети и режими на исхрана што е навистина тешко да одлучите кој план е најдобар за вас, а кој е неефективен (па дури и опасен). Во продолжение прочитајте нешто повеќе за алкалната диета.
Што претставува алкалната диета?
Основната идеја на овој режим на исхрана е да се замени киселата храна со производи кои имаат рН вредност 7 или повеќе. рН вредност 7 е неутрална. Сè што има пониска вредност се смета за кисело. Сè што има повисока вредност е база. Се верува дека консумирањето алкална храна ќе го одржи рН нивото на вашата крв што е можно поалкално. Покрај тоа, се смета дека оваа диета може да го намали ризикот од развој на бројни болести, вклучувајќи рак и артритис, да го зголеми нивото на енергија, да ги намали воспалителните процеси и да има позитивно влијание на целокупното здравје.
Што можете да јадете?
Секоја храна со алкална рН вредност е дозволена, вклучувајќи го поголемиот дел од овошјето и зеленчукот, тофу, соја, некои јаткасти плодови (како бадеми) и семки (како ленено семе).
Што не смеете да јадете?
Овде спаѓа секоја храна која создава киселост во телото. Тоа се месо, јајца, поголемиот дел од млечните производи (дозволено е козјо млеко), преработена храна, кофеин и алкохол.
Дали функционира оваа диета?
Според нутриционистите, диетата не функционира. Иако храната во алкалната диета е навистина здрава, нема научни докази според кои алкалните производи ја менуваат рН вредноста во вашата крв. Телото го регулира нивото на рН вредноста во телото, па речиси е невозможно да се влијае на него со исхраната. Иако алкалната диета охрабрува консумирање овошје и зеленчук, односно повеќе растителна храна, и забранува консумирање преработена храна, сепак недостигаат научни истражувања кои ќе ја поддржат нејзината ефикасност.
Дали алкалната диета може да предизвика каква било штета?
Храната која е дозволена во овој режим на исхрана не е нездрава. Но, ограничувањето на само неколку групи храна (дури и ако тие се добри) не се препорачува, особено ако диетата не е докажано ефективна. Покрај тоа, Роберт Јанг, човекот кој ја смислил оваа диета моментално е во затвор бидејќи лекувал без дозвола. Сепак, за каква промена и да се одлучите во вашата исхрана, секогаш е најдобро прво да се консултирате со вашиот лекар.
Прочитајте нешто повеќе за најпопуларните диети.
