Бидете му поддршка на вашиот партнер затоа што машката менопауза може да се појави без предупредување

За женската менопауза се разговара многу почесто, иако и кај мажите во 50-тите години се јавуваат хормонални промени, што може да доведат до знаци на менопауза.

Бидете му поддршка на вашиот партнер затоа што машката менопауза може да се појави без предупредување

Честопати се дискутира и се пишува за тоа како менопаузата влијае врз психофизичката состојба и врз целокупното здравје на жените, до тој степен што сите промени во расположението на жената или здравствените проблеми што се појавуваат по 50-годишна возраст ги поврзуваме со менопаузата. Од друга страна, многу малку се зборува за истиот проблем, односно за хормоналните промени што влијаат на мажите на возраст од околу 50 години, иако тие минуваат низ малку поразлични симптоми.

Лекарите се поделени околу мислењето дали станува збор за состојба слична на промените што се случуваат кај жените и за процентот на мажи кои доживуваат симптоми на менопауза, но нема сомнение дека се случуваат промени.

„Машката менопауза“ е стручно наречена андропауза, што значи период во кој паѓа нивото на тестостерон и на другите хормони кај мажите.

Тестостеронот е хормон што доведува до промени за време на пубертетот: управува со физичкото и со менталното здравје, ја одржува мускулната маса, го стимулира сексуалниот нагон и други важни функции во машкото тело, така што промените во нивото на хормоните во 50-тите години може да предизвикаат големи промени и кај мажите.

Состојбата може да кулминира со недостаток на тестостерон, познат како хипогонадизам (намалено лачење на тестостерон).

Според многубројни истражувања, оваа состојба може да предизвика различни симптоми и компликации кај мажите, вклучувајќи:

  • ниско ниво на енергија
  • депресија или тага
  • чувство на намалена мотивација
  • неможност за фокусирање на работите
  • развој на градите
  • еректилна дисфункција
  • неплодност
  • намалено либидо
  • намалена густина на коските и мускулна маса
  • опаѓање на косата
  • топлотни бранови

Ако забележите некој од овие симптоми или повеќе од нив, посетете го вашиот лекар. Врз основа на тестовите на крвта, може да се утврди нивото на тестостерон во организмот и дали е потребен третман. Во повеќето случаи, подобрувањето може да се постигне со промена на навиките или со поздрав начин на живот. Ова првенствено значи квалитетна и урамнотежена исхрана, редовно вежбање, доволно сон и помалку стрес.

Прочитајте кои рани симптоми може да ви помогнат во откривањето на 10 сериозни болести.


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       

За авторот
Со пишување може да постигне многу. Никогаш не се откажува од своите соништа.

Поврзани содржини

Остави коментар