Претходно
ТВ серија: Засекогаш (Forever)
Датум: 06 ное 2014
Коментари: 0
ТВ серија за човекот кој постојано се враќа од мртвите
Главни улоги: Јоан Груфуд, Џоел Дејвид Мур, Алана де ла Гарза, Џад Хрш
Жанр: драма, научна фантастика
Креатор: Метју Милер
Премиера: 22 септември 2014
Број на сезони: 1
Времетраење: 43 минути
Јазик: англиски
Наша оценка: 9/10
Ваша оценка: 
(11 гласа, просек: 9,91 од 10)
Loading...
Хенри Морган (Јоан Груфуд) е навидум сосема обичен човек кој живее сосема обичен живот. Тој работи како форензички патолог во Њујорк и е познат по својата неверојатна способност за забележување на детали. Токму оваа способност ќе го доближи до детективката Џо Мартинез (Алана де ла Гарза), која набрзо ќе почне да го бара неговото присуство на местото на злосторството со цел да им даде нова и свежа перспектива на бруталните убиства со кои тие се соочуваат.
Па, тогаш што е толку посебно кај овој лик, би се запрашале? Неговиот живот можеби наликува на животот на сите останати, но има една клучна разлика – тој постојано се враќа од мртвите. Хенри верува дека го следи клетва која не му дозволува да умре, па токму затоа секогаш кога тој ќе го премине работ на смртта, се буди во вода, гол. Можете само да замислите во колку непријатни ситуации се има најдено поради оваа негова „способност“.
Единствената личност која ја знае неговата тајна е Ејб (Џад Хрш), со кој тој се познава од многу одамна. Ејб е секогаш тука да му помогне кога тој се наоѓа во некаква неволја, да го сослуша кога има некаков проблем, но и да го потсети на значењето на животот кое Хенри изгледа дека постојано го заборава. Тој е толку опседнат со тоа да најде лек за својата бесмртност, што понекогаш заборава дека во неговиот живот постојат личности кои повеќе би сакале да го гледаат жив отколку мртов. Од друга страна пак, тој е решен да ја открие вистината за секое убиство на кое работи, дури и по цена на неговиот живот.
На одредени моменти Хенри премногу наликува на Шерлок Холмс, особено на оној Шерлок од ТВ серијата „Елементарно“. Но, текот на приказната целосно ја одвојува оваа ТВ серија од останатите од овој жанр и токму поради тоа е еден вид освежување на малите екрани. Доколку сте расположени за криминална драма која ве води напред-назад низ времето со цел да ви покаже колку работите (не) се смениле, тогаш оваа ТВ серија дефинитивно ќе влезе во листата на вашите омилени. Хенри е лик кој едноставно не можете да не го засакате и токму начинот на кој тој гледа на животот ќе ве натера да се замислите и за начинот на кој вие го живеете вашиот живот. Накратко, „Засекогаш“ навистина заслужува шанса.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
