Што претставува духовната зрелост?

Што претставува духовната зрелост?

Во денешното општество имаме навистина дводимензионално разбирање за зрелоста. Повеќето луѓе ја дефинираат како собирање искуства кои доаѓаат со процесот на стареење, но ова не е вистина.

Што претставува духовната зрелост?

Зрелоста има мала поврзаност со надворешните искуства и речиси целосно зависи од нашето внатрешно процесирање на светот. Можеби сте имале бројни предизвици и тешкотии во животот, но ако не сте биле присутни и свесни што ви се случувало и ако не знаете како тоа ви помогнало да созреете и да научите нешто, тогаш сите искуства се само моменти.

Вистинската зрелост е состојба на внатрешна слобода, така што можете свесно да реагирате или да бидете доволно одговорни за да го забележите крајниот резултат на вашите мисли, чувства и постапки и нивното влијание врз вас, другите луѓе и светот. Развивањето на вистинската зрелост има влијание на многу делови од вашиот живот, па погледнете што всушност значи тоа.

1. Зрелоста е храброст

Зрелоста вклучува внатрешна слобода, а слободата е резултат од храброста. Односно, да бидете доволно храбри за да размислувате и да се однесувате поразлично. Во општество каде што зрелоста претставува бркање кариера, партнер, семејство и материјализам, потребна е голема храброст да го најдете патот на вашето срце и да се поврзете со вашето вистинско јас.

2. Зрелоста е искреност

Многу луѓе ја избегнуваат вистината за тоа кои се така што натрупуваат верувања, етикети и улоги во нивните животи. Но зрелата личност, на нејзиното долго патување за себеоткривање, ги гледа сите лажни улоги. Чест пример за духовна незрелост е избегнувањето на темните елементи од човечката природа, односно верување дека сте го надминале вашето „ниско јас“ и сте го допреле „повисокото јас“. Во овој случај се однесувате како „ниското јас“ воопшто да не било дел од вас. Исто така, овде спаѓа и мешањето на гласовите од вашите повреди од минатото со вашата интуиција.

3. Зрелоста е љубов

За многу луѓе, љубовта значи само добивање љубов. Да љубите некој само кога и тој ве љуби не е многу зрел начин на љубење. Да бидете зрели значи дека можете да љубите некој безусловно, дури и ако таа личност не ве сака. За вас, љубовта што ја имате кон себе ви е сосема доволна.

Духовно зрелата личност љуби бидејќи вљубеноста ѝ помага да ги прошири своите видици и да се поврзе со божественото. Таа не љуби само затоа што сака да биде љубена. Доколку и другата личност љуби на истиот начин, тогаш оваа љубов станува уште помоќна.

4. Зрелоста е сочувствителност

Многу религии ќе ве научат да правите добро поради сожалување. Но во овој случај важна е вашата емпатија за вистински да ја почувствувате и да ја разберете болката на другите. Многу луѓе се сочувствителни, но само поради ветувањето за некаква награда. Но ова е навистина деструктивно и е совршен пример за незрелост.

Добрата личност не прави добро бидејќи мора и не е водена од несвесни желби како моќ, престиж и контрола. За да направите што било добротворно, вашата мотивација мора да доаѓа од внатрешниот мир и слободата.

5. Зрелоста е простување

Мразењето на луѓето може да биде зависно. Ви дава лажно чувство на моќ и мислите дека се штитите кога мразите некого. Ова однесување ве тера да мислите само на вашата важност. Но ова е уште еден начин на кој мизеријата и самосожалувањето ве прават среќни. Вистинското простување значи преземање одговорност и донесување одлуки со кои нема да го оправдате чувството на омраза и гнев. Треба да сте доволно свесни за да знаете дека овие чувства само го намалуваат квалитетот на вашиот живот.

6. Зрелоста е прифаќање

Зрелоста значи да знаете што можете да промените, а што не. Личноста која живее во постојана состојба на конфликт со светот е роб на нејзините внатрешни реакции. Оваа личност не е слободна да одговори.

Ова не значи дека зрелата личност не е свесна за неправдата и хаосот во светот. Зрелата личност едноставно не пружи отпор. Таа е доволно свесна да знае дека не може да го промени целиот свет. Не можете да ги решите проблемите на светот доколку делувате од вашиот внатрешен гнев. Да се прифатите себеси и другите, значи да научите како да се движите во овој свет без да завршите на дното.

Будењето на зрелоста е почеток на процесот на внатрешно цутење. Ова е почетокот на патувањето кон исполнувањето на вашиот вистински потенцијал.

Погледнете ги и знаците кои покажуваат дека се претворате во мудра и зрела душа.


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       

За авторот
Студент кој секојдневно се губи низ страниците на некоја книга. Пишувањето и јогата го прават нејзиниот ден целосен.

Поврзани содржини

Остави коментар