Претходно
Нов тренд во стилизирање на косата: Фризури за скриената бунтовничка во вас!
Датум: 01 мар 2016
Коментари: 0
Светот на стилизирање на косата не престанува да нè изненадува со новите идеи за потполно неочекувани начини да го разубавите и освежите вашиот изглед кога е во прашање фризурата. До сега сè се сведуваше на промена на бојата на косата, но овој нов тренд бара да ги земете машинката за стрижење и бричот во своите раце. Ако во вас се крие бунтовничка, или едноставно сакате панк-рок стил, а не сте сигурни дали сакате некоја драстична промена, овој начин на стилизирање е одличен за вас. Станува збор за скриени тетоважи во косата!
Иако нема употреба на мастило и игли и всушност не правите трајна промена како што подразбира тетоважата, овој изглед навистина потсетува на тетовирање. Супер е тоа што може да остане скриена доколку вие го посакате тоа.
Овој начин на стилизирање на косата подразбира бричење на долниот дел од косата, најчесто близу вратот, а потоа стручниот фризер со помош на брич да ви „исцрта“ шари по косата кои може да бидат навистина креативни и за кои нема граници во можностите.
Тетоважата ќе се гледа само доколку ја подигнете косата, ако станува збор за подигнато коњско опавче или елегантна пунџа и навистина дава една егзотична, бунтовна нота!
Нам ова нè потсетува на приказна за некој таен херој, кој своето обележје го покажува само кога тој ќе посака. Па, со оваа фризура може да се чувствувате како личност со тајно алтер его. Сјајно, зар не?
