Претходно
Одлични ТВ серии за љубителите на научната фантастика и паранормалното
Датум: 11 дек 2013
Коментари: 0
Не постои ниту еден љубител на научно-фантастичните приказни кој барем еднаш не одлутал со мислите во далечните простори на универзумот каде што владеат напредни вонземјани со комплетно различни и необични сфаќања, обичаи и начини на живеење. Во сите тие умствени патувања ние замислуваме како остваруваме контакт со вонземјани, како учиме нешто од нив и како стануваме подобри како луѓе. Или пак, можеби повеќе сте насочени кон паранормалните приказни и преку вашата фантазија замислувате што би можело да ве чека по смртта и дали би можеле да останете во контакт со вашите најблиски.
Наредниве неколку ТВ серии вклучуваат вонземјани, духови, вампири и врколаци кои владеат со светот на научната фантастика и паранормалното и ве водат во неверојатна и луда авантура.
1. Далечни простори (Farscape)
Главни улоги: Бен Браудер, Клаудија Блек, Антони Симкоу, Лани Џон Тупу, Џонатан Харди, Џиџи Еџли
Жанр: научна фантастика, авантура
Премиера: 19 март 1999
Број на сезони: 4
Времетраење: 45 минути
Наша оценка: 10
Замислете го следново сценарио. Вие сте научник кој ги истражува црвјите дупки и по долго време конечно се осмелувате да проверите дали вашата теорија би можела да биде успешна и во пракса. Но, по неверојатен сплет на околности вие се будите на брод кој е во сред битка и сте опколени со вонземјани. Што би направиле? Токму ова му се случи на научникот Џон Крајтон (Бен Браудер) додека ги истражувал црвјите дупки. И за работите од лоши да станат уште полоши тој брзо сфаќа дека вонземјаните се всушност избегани затвореници на украден брод. Жив брод.
Оваа ТВ серија има навистина добра приказна и секој од глумците одлично ја доловува својата улога. Покрај нив вие ќе се чувствувате како да ги истражувате далечните простори на универзумот, а Џон Крајтон без престан ќе успева да ве засмева во навидум неизбежните ситуации со шеги кои им се добро познати на луѓето, но многу несфатливи на неговите нови пријатели.
