Искрено писмо од еден маж: Личностите што ги љубиме заслужуваат да го избереме најдоброто од нив!

Сакав да бидам со неа. Навистина сакав неа да ја изберам. Таа беше неверојатна жена, паметна, смешна, сензуална и секси. Од нејзината смисла за хумор целото тело ми се тресеше од смеа, а нејзината егзотична убавина на моменти можеше да ми го помати умот.

Моето среќно место беше наутро кога се будев со неа во моите прегратки. Бескрајно ја љубев.

За жал, како што се случува со многу млади парови, нашето незнаење како правилно да се сака ни создаде стресни предизвици во врската. Моите прекрасни утра се претворија во напнати, незрели ситуации што се манифестираа низ секојдневниот заеднички живот. Почнав да се прашувам дали некаде постои некоја жена која ќе биде полесно да ја сакам, и која мене подобро ќе ме сака.

Како што поминуваа месеците, така мислата сè повеќе ме окупираше, па сè помалку ја избирав неа. Секој ден, во текот на тие 5 години, сè помалку ја избирав.

Останав со неа. Но се откажав. И двајцата патевме.

Да ја изберам неа значеше да се фокусирам секој ден на прекрасните работи што таа ги внесуваше во мојот живот, за кои би можел да бидам благодарен: Нејзината насмевка, сензуалност, разиграност, пријателство и уште многу други.

За жал често ми беше тешко или скоро невозможно да уживам или воопшто да ги забележам сите оние прекрасни нешта во врска со неа.

Премногу се насочив на лутината, несигурноста, копнежите и другите аспекти од нејзината силна личност што имаа влијание на мене. Што повеќе се фокусирав на најлошото, толку почесто и појасно го забележував истото, и поради тоа уште посилно реагирав со моето најлошо однесување. А сè тоа ја нарушуваше нашата врска… и поради тоа секојдневно сè помалку ја избирав.

А таа силно се бореше да ја изберам токму неа. Но, за џабе. Не можете некого да натерате да ве избере, дури и кога ве сака.

Сега сфаќам дека често беше лута затоа што не се чувствувала сигурно со мене. Почувствувала дека сум престанал, во моите зборови и дела, да ја избирам секој ден и се плашела дека ќе ја напуштам.

И јас ја напуштив.

Всушност ја изневерив, бидејќи секој ден, во текот на 5-те години, се фокусирав на тоа што ми сметаше наместо на тоа што кај неа го обожавав.

Како редок и нежен цвет што гордо го донесов дома, а потоа престанав да го наводнувам, премногу пати ја оставив сама да венее во врелината на нашиот интимен однос.

Секогаш избирајте го најдоброто кај жената што ја сакате. Изберете ја неа во целост.

Ако сте во врска, поставете си го веднаш ова прашање:

„Зошто денес повторно ќе го изберам својот партнер?“

Ако не можете да пронајдете добар одговор, побарајте подлабоко и ќе го најдете. Бидејќи во најдлабоките вистини на срцето можеби и нема причина.

Ако помине премногу време и не можете да откриете зошто секој ден би избирале да бидете со својот партнер, а вашата врска е полна со стрес, пуштете ги да си одат. Направете место во вашиот живот за да може да влезе некој друг, кој овој пат ќе можете да го одбирате секој ден.

Бидејќи личностите што ги љубиме заслужуваат да го избереме најдоброто од нив. Секој ден!

САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?