Педофобија – Дали имате страв од деца?

Фобијата претставува состојба на умот која е поврзана со стравот. Таа може да го промени однесувањето кај една личност до таква мера што може да ѝ го искомплицира животот. Скоро и да не постои личност која нема фобии. Најчестите и најпознатите фобии се: аерофобија (став од летање), акрофобија (страв од височина), клаустрофобија (став од мали, затворени простории), хемофобија (страв од крв) и така натаму… Но, дали сте слушнале за педофобија? Во продолжение прочитајте што тоа значи, кои се симптомите и причините за настанување на овој страв и како можете да го победите.

Педофобија – Дали имате страв од деца?

Што е педофобија?

Не ви се допаѓаат деца? Сè повеќе луѓе чувствуваат одредена одбивност кога треба да се подружат со деца, а тоа најчесто е поради вревата која малите ја предизвикуваат. Постојат и луѓе кои не сакаат да држат бебе во своите раце, бидејќи тоа им изгледа премногу нежно за нив. Доколку се работи само за ова, тогаш не станува збор за фобија.

Педофобија е страв од деца и бебиња. Не затоа што на некој не му се допаѓаат, или пак му досадуваат, туку станува збор за ирационален страв кој е поврзан со анксиозност, и кој може да прерасне во паника. Една работа е некој да не сака да има деца во негова близина кога се обидува да се релаксира, а сосема друга е кога близината на децата предизвикува криза како анксиозност.

Симптоми на педофобија

Ирационалниот страв кој се манифестира од педофобијата се јавува исто како и кај другите фобии. Стравот се појавува во моментот кога во близина има мало дете или бебе. Личноста која има педофобија доживува симптоми слични на анксиозност, како вртоглавица, потење, забрзано срцебиење, нервоза и отежнато дишење.

Физичките симптоми се влошуваат кога некоја личност ќе започне да размислува дека поради оваа фобија не може да се прилагоди во животот и во социјалните кругови. Личностите кои страдаат од педофобија го поминуваат животот избегнувајќи деца кои ги има насекаде. Поради неможноста да бидат во присуство на деца, тие почнуваат да се чувствуваат како лоши личности и како некој кој не е социјално прилагодлив.

Причини за педофобија

Сè уште не е познато што точно ја предизвикува педофобијата. Коренот на многу фобии е пронајден во самото растројство на анксиозноста која е предизвикана од ирационални стравови. Сепак, овој атипичен страв од деца може да биде предизвикан од некое искуство кое предизвикало траума.

Трауматското детство или доживеаните непријатности за време на најраниот период на растење, може да биде мотив за развој на ова растројство. Исто така, причина може да биде и непријатното искуство со дете, како на пример, сообраќајна несреќа, па дури и смрт.

Лекување на педофобија

За да се надмине ирационалниот страв од деца, неопходна е помош од стручно лице, односно психолог. Не треба да се заборави дека некои фобии можат да предизвикаат претерани реакции во кои може да дојде и до насилство. Кога се работи за педофобија, не е загрозена само личноста која страда од неа, туку и децата кои се наоѓаат во близина на таа личност.

Терапијата која се одредува од страна на експерт, за цел има најпрво да ја пронајде причината за појавата на оваа фобија, а потоа фокусот се става на контролирање на однесувањето кај личноста која страда од педофобија. Најчесто се вклучуваат техники на опуштање со цел да се редуцира стресот настанат во присуство на деца.

Дознајте и што е черофобија и дали страдате од неа?

САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       


За авторот
Студент по Македонски јазик и книжевност. Кога не пишува - чита, и обратно. Сигмунд Фројд, нејзините миленичиња, цртани, Фреди Меркјури, стари предмети и Мото ГП.

Поврзани содржини

Остави коментар