Претходно
Новогодишна елка: 3 стилови на украсување за сечиј вкус
Кога некој ќе спомне Божиќ или Нова година, првото нешто на кое помислуваме се украсите. Празничното шаренило се забележува на секој чекор, а вистинската магија започнува во домот и тоа на новогодишната елка.
Независно дали се работи за природна или пластична, веселата и разиграна новогодишна елка е најубавиот украс во домот за време на празниците. Затоа мора да ѝ дадете оригинален карактер и стил. Доколку сѐ уште не сте сигурни како да ја украсите, следуваат 3 идеи, па вие одберете ја онаа која најмногу соодветствува со вашиот амбиент.
1. Класична, еднобојна новогодишна елка
Богато украсената елка со разни лампиони во златна, црвена или сребрена боја за многумина е омилената комбинација. Најпрвин изберете боја која најмногу ви одговара, а потоа помеѓу класичните лампиони ставете и по некоја машна или оригинален висечки украс во истата боја. На врвот на елката, се разбира, ставете ѕвезда.
2. Елегантна новогодишна елка во пастелни бои
Пастелните бои како виолетова, бордо, нежно розова и крем, вашата елка ќе ја претворат во романтичен украс на домот. Со овие бои одлично се вклопуваат сребрените и белите лампиони, а деталите, како што се украсите со пердуви и циркони, дополнително ќе ја освежат елката и ќе ја направат доста интересна и занимлива.
3. Разиграна, индивидуална новогодишна елка
Ако сакате да си играте со боите, формите на материјалите и рачно изработените украси, тогаш уникатната разиграна елка е идеална за вашиот дом. Во оваа приказна нема ограничувања и затоа е важно да си поиграте со најразновидни украси. Популарните црвено-бели лижавчиња, ѕвончињата и лампионите, украсните ленти, машни, па дури и колачите се совршениот избор за ваквата весела елка. Пуштете ја имагинацијата да лудува!
