Претходно
Астрологијата и максимизирањето на вашите таленти
Секој од нас има специјални таленти кои го прават различен и уникатен во однос на останатите луѓе. Но, целото тоа „патување“ додека да сфатиме кои се тие и како да го извлечеме најдоброто од нив, може да потрае подолго отколку што сме се надевале. Астрологијата може да ви помогне како да ги идентификувате квалитетите кои ги поседувате длабоко во себе и да сфатите што е она кое имате да му го понудите на светот.
Овен
Вие сте надарени со огромна храброст, благодарение на која ги прифаќате предизвиците и авантурите кои ви се појавуваат на патот. Вашата пионерска способност за започнување нови проекти и иницирање нови идеи, ве прави легендарна личност во очите на сите оние кои добро ве познаваат.
Максимизирајте ги вашите таленти, соработувајќи со некој кој е подготвен да презема ризици исто колку и вие.
Бик
Вие сте способни да создавате чувство на стабилност и комфор на луѓето околу вас. Знаете како да се релаксирате и да го живеете секој момент од вашиот живот.
Максимизирајте ги вашите таленти на начин што ќе внесете повеќе елан и волја во извршувањето на вашите секојдневни активности и ќе ја препознаете светоста на едноставноста.
Близнаци
Комуникацијата и секојдневното учење нови работи, се составен дел од вашата личност. Начинот на кој вие умеете да процесирате и споделувате информации, ви овозможува да умеете да создавате одлични тимови од луѓе, кои меѓусебно совршено си одговараат.
Максимизирајте ги вашите таленти со тоа што ќе ја определите целта поради која секојдневно ги акумулирате сите тие информации. Запрашајте се себеси: „Кое е подлабокото значење на односите кои ги градам со другите луѓе? “
Рак
Вие умеете да направите да „цвета“ речиси сè што ќе наумите и сте способни да се грижите и да ги заштитите оние кои ви се најбитни во животот, сè додека е тоа изводливо.
Максимизирајте ги вашите таленти со тоа што вашата способност за помагање на другите луѓе ќе ја пренасочите кон себе, со цел да почнете да ги негувате и вашите сопствени соништа и цели.
Лав
Вие имате вроден ентузијазам за забава и уживање во секој момент од вашиот живот. Вашиот палав дух и дарежлива природа, им го прават животот на луѓето околу вас барем малку поедноставен.
Максимизирајте ги вашите таленти со тоа што ќе ја зголемите вашата „публика од обожаватели“ и ќе се обидете да гледате пошироко на работите. Размислувајте како најдобро можете да ја употребите вашата дарба за повисоки цели?
Девица
Вие имате чувство за тоа како да ги подобрите работите кои се случуваат околу вас. Благодарение на вашите високи стандарди, умеете да го кренете нивото на квалитет во работата и да ги мотивирате другите околу вас повеќе да се трудат да го дадат максимумот од себе.
Максимизирајте ги вашите таленти со тоа што ќе имате повеќе разбирање за сопствените и туѓите грешки, како составен дел од процесот на учење.
Вага
Вие имате способност да создавате убави нешта и да воспоставувате рамнотежа во сè што правите, што на другите околу вас им помага да се релаксираат и да уживаат во овој свет.
Максимизирајте ги вашите таленти така што повремено ќе се запрашате себеси што сакате и што ви е потребно во животот, а потоа ќе настојувате да ги реализирате тие желби и потреби, пред да „трчате“ да ги остварувате туѓите.
Скорпија
Вие имате емоционална визија остра како ласерски зрак, која ви овозможува да гледате под површината на нештата. Вашата способност инстинктивно да ги „прочитате“ потсвесните мотиви на другите луѓе, ви дава една уникатна и невообичаена моќ и длабочина.
Максимизирајте ги вашите таленти со тоа што ќе поминувате повеќе време во природа. Допирот со природата ќе ве стабилизира, ќе ви даде душевен мир и ќе ви помогне да создадете баланс во вашето постојано „патување“ од површниот, надворешен свет, кон оној подлабокиот.
Стрелец
Вашата оптимистична и љубопитна природа ви овозможува да гледате на светот од повеќе различни перспективи. Вие сте роден ученик, кој тежнее да акумулира што е можно повеќе знаење, за новите филозофии и концепти на животот.
Максимизирајте ги вашите таленти така што ќе создадете баланс во вашата двојна улога на учител и ученик. Доколку успеете во тоа, никогаш нема да стагнирате во ниедно поле од вашиот живот и ќе бидете задоволни од сами себе.
Јарец
Вие знаете како да ги определите вашите цели и како да ги претворите во реалност, што ве прави способни за заработување пари и овозможување финансиска стабилност на долг рок.
Максимизирајте ги вашите таленти на начин што ќе бидете емотивно подостапни за другите луѓе, ќе бидете поотворени за комуникација и без страв ќе ја покажувате вашата ранливост кога тоа го налага ситуацијата.
Водолија
Вие инстинктивно умеете да ја видите „големата слика“ на нештата кои се случуваат околу вас. Талентирани сте да измислите нови концепти и да му понудите на светот одлични идеи, кои им помагаат на луѓето околу вас да ги подобрат нивните животи.
Максимизирајте ги вашите таленти со тоа што ќе си дадете себеси повеќе време за забава и насмевки. Тоа ќе ви помогне да размислувате покреативно и истовремено да градите подобра конекција со другите луѓе.
Риби
Моќната имагинација која ја поседувате ви создава совршени слики во вашата потсвест, кои ви создаваат одлична визија за светот околу вас. Таа особина која ја понесувате секаде со себе, не само што ги инспирира другите луѓе, туку и им влева надеж.
Максимизирајте ги вашите таленти со тоа што ќе ги претворите вашите визии во реалност, преземајќи ги неопходните чекори за да ги материјализирате.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
