4 причини зошто пливањето е добро за вашето здравје

Автор: Маја Линкова

Влегувањето во базен веројатно ве асоцира на одмор и на разладување за време на летните горештини. Но, пливањето е и одлична кардио-вежба. Не ги оптоварува зглобовите, а активноста на целото тело согорува калории. Исто така, го истегнува и издолжува вашето тело, а тоа е нешто што не можете да го постигнете со обични вежби. Тренерот по пливање Ерл Волтон, нагласува 4 причини зошто пливањето е препорачливо за сите.

1. Крос-тренинг

Веројатно сте чуле дека за оптимален фитнес тренинг, најдобро е да комбинирате различни вежби. Пливањето има поразличен ефект од вежбите кои ги правите во теретана или дома. Тоа е идеално за мускулите кои се најчесто занемарени со вообичаените вежби. „На спринтерите или на луѓето кои вежбаат во теретана, пливањето им овозможува одмор на глуждовите, колената и колковите“, истакнува Волтон.

2. Совршени мускули

Пливањето може да ви ги зајакне рацете, нозете, рамењата, а за кратко време ќе забележите и зацврстени мускули на задникот. „Водата е 724 пати погуста од воздухот, па така целото ваше тело постојано прави отпор“, тврди Волтон.

3. Појако срце

Со пливањето, го учите вашето тело на нови техники на дишење, посебно кога вашата глава е во вода и свртена надолу. Длабоко вдишувате и издишувате воздух, така што вашите бели дробови се шират и произведуваат повеќе кислород, а на тој начин срцето ви станува посилно.

4. Бестрашност

Пливањето ја зголемува вашата самодоверба. Самото чувство кога учите некоја нова техника и ја совладувате, е навистина охрабрувачко. Самиот предизвик кој си го наложувате, на пример да го испливате целиот базен по должина, ви нуди неверојатно чувство. „Како тренер, оваа можност за мене е една од најважните предности на пливањето“, заклучува Волтон.

Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.