Високата емоционална интелигенција води кон поголема заработка

Високата емоционална интелигенција води кон поголема заработка

Сигурно многумина ви рекле дека не треба да им дозволувате на вашите емоции да застанат помеѓу вас и вашата работа. Сигурно исто така сте чуле и дека треба да ја држите вашата емоционална страна за дома, бидејќи единствениот начин да успеете во животот е доколку сте силни и тврдокорни. И бидејќи толку често сте ги слушале овие совети, сигурно никогаш не сте се сомневале во нив. Но, време е да почнете. Една нова студија сугерира дека токму спротивното е вистина, односно доколку имате добро око за емоциите на вашите колеги, вие ќе заработите многу повеќе пари.

Високата емоционална интелигенција води кон поголема заработка

 

„И покрај тоа што соработката со вработените и справувањето со луѓето често вклучува читање на нивните емоции и одредување на нивното расположение, не сите се добри во тоа. Читањето на емоциите на другите луѓе е исто како учењето други јазици или атлетика – некои луѓе се добри во тоа, додека други едноставно не сè“, вели д-р Жерард Бликл.

Истражувачите од Универзитетот Бон во Германија им покажале на група испитаници серија од гласовни снимки и фотографии и побарале од нив да ги идентификуваат емоциите кои биле изразени на нив. Во просек, испитаниците успевале да ја идентификуваат соодветната емоција во 77% од случаите. Оние кои постигнале над 80% биле сметани за „добри“, а оние кои постигнале над 90% биле сметани за „навистина добри“ во читањето емоции кај другите луѓе.

Откако задачата за препознавање на емоциите била завршена, истражувачите побарале од супервизорите и соработниците на испитаниците да дадат проценка за нивната перформанса на работа. Тие откриле дека оние кои постигнале повисок скор на задачата се сметаат за личности со повисоки социјални и политички способности од оние кои добиле пониски резултати. Но, она што е најневеројатно е дека нивната заработка била значително повисока од останатите.

Колку навистина се точни овие резултати? Д-р Бликл вели:

„Бидејќи бевме во можност да ги исклучиме сите алтернативни објаснувања за овие резултати (на пример, полот, годините, тренингот, позицијата), овие податоци имаат цврста основа. Дури и по контролата на сите варијабли, ефектите од способноста за препознавање на емоциите има големо влијание врз заработката.“

Всушност ако добро размислите, ова откритие има логика. Оние кои можат да ги читаат другите луѓе секогаш знаат да им го кажат вистинското нешто. Оваа способност прави тие да бидат повеќе ценети и поради тоа има поголеми шанси да добијат побрзо унапредување или зголемување на платата. Токму затоа кога сте на работа, не се фокусирајте само на вашите работни задачи туку обрнете внимание и на вашите соработници. Ќе ви се исплати.

 


Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       

За авторот
Дипломиран психолог кој обожава да пишува. Автор на научно-фантастичната книга „На работ од времето“. Животно мото ѝ е дека не смее да помине ниту еден ден без кафе и танцување.

Поврзани содржини

Остави коментар