Во едно далечно време (Once Upon a Time)

ТВ серија за проклетствата од минатото и за оние на кои им е пишано да ја променат иднината

Главни улоги: Џинифер Гудвин, Џенифер Морисон, Лана Парија, Џош Далас, Роберт Карлајл

Жанр: драма, авантура, фантазија

Премиера: 23 октомври 2011

Јазик: англиски

Времетраење: 45 минути

Број на сезони: 1

Наша оценка: 8

Ваша оценка: [ratings]

———————————————————————————————————————————————————————-
Замислете си живот во кој сте заглавени во времето и просторот… Навидум сè е нормално и во ред, а всушност не сте свесни за она што ви недостасува. Тоа е проклетство. За него често е раскажувано во бајките, но овојпат тоа е дел од сегашноста. Само една личност може да го скрши и да ги ослободи сите од таа непозната стега, од таа мрачна покривка префрлена врз целиот град, која ги прави луѓето несреќни и мизерни. За среќа, стрелките на часовникот се помрднуваат. Сегашноста почнува да тече. А иако минатото е раскажано во приказните, иднината ни е сосема непозната. Вистинска мистерија…
———————————————————————————————————————————————————————-

Приказна: Ема Свон е 28-годишна девојка, ловец на награди, ладнокрвна, па дури и брутална. Една вечер, после успешно завршената работна мисија, на нејзината врата во домот затропува 10-годишно момче, кое вели дека доаѓа од Сторибрук, Мејн и тврди дека е нејзин син. Таа презема одговорност да го врати назад, но кога стигнува таму, ја запознава неговата злобна мајка и поради тоа одлучува да остане. Нејзиното останување значи дека работите ќе почнат да се менуваат и дека постои надеж народот да биде спасен од проклетството. Ова е сегашноста, во која 10-годишниот Хенри е убеден дека ситуацијата во која се наоѓа Сторибрук е масло на неговата мајка, која во минатото била злобната вештерка од приказната за Снежана. Нормално, во ова никој не верува, но случка по случка, полека почнуваат да се отклучуваат затворените врати зад кои длабоко се закопани тајните на Сторибрук, па фантазијата сè повеќе станува реална.

Паралелно се одвива приказната за Снежана, кога пред 28 години, на денот на нејзината венчавка со принцот, злобната вештерка упаѓа на свеченоста и се заканува со проклетство кое засекогаш ќе ги смени животите на сите, секако кон полошо, а нејзе ќе ја направи апсолутен господар. Пред да дојде судниот час, Снежана предвремено ја раѓа нејзината ќерка Ема, која е единствената што се спасува од проклетството и единствената, која 28 години подоцна, може сите да ги избави од него.

Иако дејството во серијата „Во едно далечно време“ се базира на познати ликови од бајките, тоа не ја прави помалку интересна. Напротив, една проверена приказна, едни добро изградени ликови се искористени како темел за поставување на нов, современ слој од дејствија кои интересно се испреплетуваат со минатото, не дозволувајќи ни да ја предвидиме иднината или воопшто насоката во која приказната ќе продолжи да тече. Светските критичари исто така не штедат на убави зборови и високи оценки кога станува збор за „Во едно далечно време“. Сепак, ова не е серија што ќе го погоди сечиј вкус, но ако го погоди вашиот, со сигурност ќе уживате во неа.

Кога и како да го гледате: Зарем има посоодветно време за бајка од моментот кога ќе си легнете!? Но, дури и да не го изберете овој момент, серијата нема да ви биде „тешка“ за кој било друг период од денот и ден во неделата. Лесно ќе ја конзумирате приказната, па може да се случи да исконзумирате повеќе епизоди едно по друго.

———————————————————————————————————————————————————————

Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.