Ваша оценка: 1 ѕвезда 2 ѕвезди 3 ѕвезди 4 ѕвезди 5 ѕвезди 6 ѕвезди 7 ѕвезди 8 ѕвезди 9 ѕвезди 10 ѕвезди (15 гласа, просек: 8,67 од 10)
Loading...

„Војна на ѕвездите: Силата се буди“ е достојно продолжение на оригиналната трилогија на Џорџ Лукас која со декади ги држи фановите на работ од седиштата во кино салите насекаде ширум светот. Приказната, која се случува 30-тина години после настаните во „Враќањето на Џедаите“, структурно го содржи сѐ она што се очекува, па дури и малку повеќе. Ова продолжение е вистинска ѕвездена авантура која успева да биде нова, свежа и ажурирана на носталгичен начин и која е исполнета со старата душа на „Нова надеж“ и „Империјата возвраќа на ударот“.

Сценариото е наративно стабилно, со добар тек на дејство и низ сцените и дијалозите помеѓу ликовите оддава почит на претходните епизоди. Музиката била, е и ќе остане незаменлива и врежана во сечија меморија. Визуелните ефекти и фотографијата се маестрално сработени во една комбинација на дигиталното и практичното. Овој пат, не се соочуваме со непотребни кадри од експлозии и возбудливи борби со лајтсејбери само за да се задоволи човечкото око и жедта за адреналин. Тука способните раце на филмскиот екипаж, под лидерство на прецизната и вешта режија на Џ. Џ. Абрамс, нè фокусираат на она што е навистина важно: ликовите и нивните животни приказни.

Можеби Хан Соло и Леа ќе останат најомилената романса на филмските платна, и можеби никогаш нема да се измориме од перипетиите кои вечно ќе го следат семејството Скајвокер, но овој пат Реј, Фин, По и Кајло Рен се вистинските херои и антихерои кои го одвлекуваат вниманието. Реј (Дејзи Ридли) е силен и интелигентен лик кој е страстен борец за правда и кој никогаш нема да ја заборави својата детска страна. Фин (Џон Бојега) е несуден, комичен херој со огромна и тешка карактерна длабочина, чија главна цел е да го порази ладнокрвниот стормтрупер во себе. По (Оскар Ајзек) е вешт пилот кој со својата храброст, харизма и оптимизам веднаш дава леснина на филмското дејство. Сите заедно се еден фантастичен триаголник на ликови кои сами ги кројат своите судбини и кои заедно се борат против темната страна олицетворена во мистериозниот Кајло Рен (Адам Драјвер), кој пак несомнено потсетува на една понесигурна и помлада верзија на Вејдер.

Изработен со љубов и почит од најразлични генерации на актери и филмаџии кои си го знаат занаетот, „Силата се буди“ ќе ве натера да се потсетите на сѐ она што го сакавте во „Војна на ѕвездите“ и токму таа љубов ќе ве натера уште повеќе да се посветите на овој феномен. А, ако ги гледате за прв пат, тогаш добредојдовте во една многу далечна галаксија…

💗 Денес ви споделуваме рец

💗 Погледнете ги овие невер

📢 Денес ви споделуваме рец

Следете нѐ на Инстаграм

САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

За авторот

Новинар. Самопрогласен актер. Џедај. Животна форма еволуирана да живее од филмови, видеоигри, музика, хумор и технологија. Хоби и рекреација: Појадок, ручек, вечера.

Претходно