Претходно
Филм: Капетан Америка: Граѓанска војна (Captain America: CIvil War)
Низа суперхерои застануваат на спротивните страни во политичката дебата помеѓу слободата и безбедноста
Режија: Антони и Џо Русо
Улоги: Крис Еванс, Роберт Дауни Џуниор, Себастијан Стан, Даниел Брул
Времетраење: 147 минути
Премиера: 05 мај 2016
Jазик: англиски
Жанр: акција, авантура, научна фантастика
Наша оценка: 9/10
Ваша оценка: 
(12 гласа, просек: 9,92 од 10)
Loading...
„Капетан Америка: Граѓанска војна“ е тематски амбициозно прославување на суперхеројскиот филмски жанр кое, и покрај своите фантастични теми, успева да ја задржи човечноста. Како и самото сценарио што го обработува, „Граѓанска војна“ е судир на спротивности – хумористичен и паралелно доволно сериозен; темен и истовремено ведар и енергичен; забавен, акционен, физички и истовремено психолошки поткован филм кој во ниеден момент не го симнува спектакуларниот стандард по цена на тежината на својата митологија.
Со бројните суперхерои, филмот може да се нарече ново полупродолжение на „Одмаздници“ каде секој има своја причина и филозофска длабочина со што ја докажува својата присутност. Главниот антагонист во филмот, Барон Земо (Даниел Брул) е вешт манипулатор кој ги држи конците во свои раце, управувајќи под мотото „Раздели па владеј“; Баки Барнс (Себастијан Стан) се обидува да го искорени својот внатрешен крволочен убиец – Зимскиот војник; Ванда Масимоф (Елиазбет Олсен) и Визија (Пол Бетани) се обидуваат да се соочат со гравитацијата и импликациите на нивните моќи;
Клинт Бартон (Џереми Ренер), Сем Вилсон (Антони Маки) и Џејмс Роудс (Дон Чидл) стојат како синоними за лојалноста и стабилноста, додека Наташа Романоф (Скарлет Јохансон) како и вообичаено си поигрува и на двете страни. Од новите ликови, Питер Паркер (Том Холанд) е оној Спајдермен чија приказна конечно го оправдува неговото суперхеројско име и кој го чекавме со години, а неговото височество Т’чала (Чедвик Босман) е Црниот Пантер чие чувство за правда и слобода може да се мери со она на Капетан Америка.
Во режија на незаменливото филмско дуо, браќата Русо, „Граѓанска војна“ ни го покажува конфликтот помеѓу Тони Старк или Железниот човек (Роберт Дауни Џуниор) и Стив Роџерс или Капетан Америка (Крис Еванс) кои застануваат на две различни страни во борбата за и со интернационалното право. Капетан Америка, доследно на своето минато, верува дека прецедентот е опасен и дека најбезбедните раце се сѐ уште оние на одмаздниците, а Железниот човек верува дека прецедентот е прагматичен кога ќе се земат предвид невините жртви и колатералната штета која хероизмот може да ја предизвика.
Двајцата имаат солидна перспектива и двајцата се во право со опција да го решат проблемот со добра комуникација, но наместо со реторика се одлучуваат тоа да го сторат со сила, бруталност, одлучност и стратешки тактики.
Со својата неочекувана свежина, филмот го руши суперхеројското клише и наместо повторливи мотиви ја разработува големината, себичноста и емоционалноста на воените дела, прашањето дали недолжните жртви ја негираат правдата на една благородна мисија, цената и привлечноста на одмаздата и постојаните внатрешни борби на хероите кои се обидуваат да ги докажат и оправдаат своите минати и сегашни дела.
Сето тоа комбинирано дава значаен, симболичен проблем на одговорност, транспарентност и предвидување во форма на една Шекспирова трагикомедија на личен конфликт и лојалност. Вистинската победа не припаѓа ниту на тимот Железниот човек, ниту на тимот Капетан Америка, туку на тимот Марвел.
