Претходно
Развијте ги овие 10 карактеристики за да станете личност што сите ќе ја сакаат
Повеќето луѓе мислат дека личностите што сите ги сакаат се родени под среќна ѕвезда и дека се симпатични на прв поглед благодарение на својата природа. Но, тоа не е точно. Овие личности имаат некои особини што другите ги немаат, од кои едниот дел се развиени за време на воспитувањето во детството, а другиот дел е изграден самостојно стремејќи се да бидат најдобрата верзија од себе.
Квалитетите како што се пристапноста, позитивноста и умереноста се одлики на луѓето кои имаат висока емоционална интелигенција, но вие исто така можете да станете омилени во друштвото ако поработите на себе. Ако ги развиете овие карактеристики, ќе бидете во групата луѓе што сите ги сакаат и ќе ја подобрите вашата емоционална интелигенција.
1. Бидете искрени
Искреноста е најважната особина што ви е потребна за луѓето да имаат добро мислење за вас. Никој не сака лажговци. Луѓето се потпираат на искрени личности затоа што знаат дека може да им веруваат. Тешко е да верувате некому ако не знаете кога ја кажува вистината, а кога не. Искрените луѓе знаат кои се, имаат самодоверба да се чувствуваат добро во својата кожа и да ги искажат своите мислења.
2. Поставувајте промислени прашања
Најголемата грешка што ја прават луѓето кога слушаат некого додека зборува е тоа што тие се фокусираат на она што ќе го кажат потоа или како ќе влијае на нив тоа што го кажува личноста, така што често не го слушаат вистинското значење на она што е кажано. Тоа може лесно да го избегнете со поставување прашања. Луѓето сакаат да знаат дека некој ги слуша, така што прашањата што ги поставувате се знак дека ве интересира нивната приказна. Ќе бидете изненадени колку ќе го ценат тоа што знаете да слушате.
3. Не осудувајте
Ослободете се од предрасудите ако сакате луѓето да ве сакаат. Така ќе бидете попристапни и поинтересни. Никој не сака да разговара со личност која веќе има негативно мислење за некого врз основа на предрасудите што не сака да ги промени.
4. Не барајте внимание
Повеќето луѓе не сакаат да бидат во друштво на личности кои очајно сакаат да бидат во центарот на вниманието. Вие не треба да бидете екстроверт за да им се допаднете на луѓето, доволно е да бидете пријателски настроени и внимателни. Ако сте дружељубиви, самоуверени и концизни, ќе забележите колку повеќе ве почитуваат луѓето отколку ако сте самобендисани. Ако некој ве пофали за нешто, насочете го вниманието кон сите оние што ви помогнале да постигнете успех затоа што луѓето сакаат да знаат дека и нивниот труд е значаен.
5. Бидете доследни
Кога луѓето разговараат со некого, тие сакаат да знаат со кого имаат работа и каков одговор може да очекуваат. За да бидете доследни, треба да им покажете на луѓето дека дури и кога го менувате расположението, не го менувате своето однесување кон другите.
6. Користете позитивен говор на телото
Бидете свесни за вашите гестови, за изразите на лицето и за висината на тонот додека разговарате. Ако сте ентузијасти, ако не ги прекрстувате рацете, ако одржувате контакт со очите и ако сте свртени кон личноста со којашто разговарате, ќе бидете посакуван соговорник. Имајте на ум дека поважно е како ќе кажете нешто отколку што ќе кажете.
7. Оставете добар прв впечаток
За ова може да ви помогне позитивниот говор на телото. Истражувањата покажуваат дека луѓето одлучуваат дали ќе им се допаднете или не уште во првите седум секунди од запознавањето. Потоа, остатокот од разговорот се одвива во сенка на првиот впечаток. Поради тоа, треба да бидете сигурни дека имате цврст став, дека се ракувате цврсто и дека стоите исправено пред соговорникот.
8. Обраќање на луѓето со нивното име
Името е еден од основните делови на нашиот идентитет и луѓето сакаат кога им се обраќате со нивното име. Оние што им се допаѓаат на повеќето луѓе, го знаат сечие име и го користат секогаш кога ќе се сретнат со таа личност. Истражувањата покажуваат дека луѓето се чувствуваат почитувано ако оној со кого разговараат го користи нивното име за време на разговорот.
9. Смејте се
Ако се смеете додека разговарате со луѓето, тие ќе ви вратат во иста мера и по разговорот ќе чувствувате дека сте оставиле пријатен впечаток.
10. Одржувајте рамнотежа помеѓу страста и забавата
Луѓето се наклонети кон страсни личности, но тие може да бидат сфатени и како премногу сериозни. Поради тоа е важно да одржувате рамнотежа помеѓу вашата страст и можноста да се опуштите и да се забавувате. На работа бидете сериозни, но пријателски настроени. Луѓето кои се популарни во друштвото избегнуваат озборувања и се концентрираат на важни разговори со своите колеги.
Прочитајте кои навики ќе ви помогнат да имате подобра самодисциплина.
