Ова е вашето тело за време на кето диетата

Кето диетата не е нова, но стана популарна последниве години. Многумина се одлучија да се обидат да ја намалат својата тежина преку внесувањето повеќе здрави масти како замена за јаглехидратите. Ова се некои работи што треба да ги знаете за оваа диета пред да ја започнете.

Ова е вашето тело за време на кето диетата

Додека сте на кето диета, вашите клетки горат масти бидејќи немаат јаглехидрати, со што всушност најчесто „се хранат“. Оваа диета нема ограничувања како број на калории што не треба да го надминете или количество на храна која смеете да ја изедете. Плановите за кето исхрана имаат многу морска храна, црвено месо, пилешко месо, сирење, растенија кои немаат многу јаглехидрати, јајца, јогурт и здрави масти. Треба да се одбегнуваат намирници кои имаат шеќер и јаглехидрати.

Ваквиот начин на исхрана може да доведе до разни последици бидејќи на телото му е потребно време да се прилагоди на промената. Следуваат најчестите.

Се чувствувате како да имате грип

Додека се прилагодат на новата исхрана, многумина имаат симптоми слични на грипот или настинката, како главоболка, заматеност и вртоглавици. Во овој случај, најдобро е да пиете многу вода и да внесувате доволно сол.

Чувствувате потреба за јаглехидрати

Нормално е да чувствувате потреба за јаглехидрати доколку претходно сте ги консумирале во огромно количество. Оваа потреба ќе се намалува со текот на времето. Сепак, јаглехидратите не се „непријател“ и може да внесувате малку од нив.

Ви се намалува апетитот

Најчесто, диетите прават да ни се јаде повеќе, но ова не е случајот со кето диетата. Тоа се случува бидејќи не го ограничувате количеството на храна кое го внесувате, туку само видот. Згора на тоа, на желудникот му треба повеќе време да ги преработи протеините и мастите отколку јаглехидратите.

Почесто мокрите

Во првите денови од кето диетата ќе исфрлате многу вода бидејќи телото ја гори резервната глукоза во црниот дроб и мускулите. При често мокрење се губат електролити и минерали, а тоа може да доведе до дехидратација. Пијте многу вода за да го одбегнете ова.

Проблеми со столицата

Секогаш кога се губат течности се појавуваат и проблеми со столицата. За да го спречите ова, пиењето доволно вода е многу важно. Исто така, се препорачува јадење намирници кои содржат многу влакна.

Пад на енергијата

Ќе забележите пад на енергијата на самиот почеток на кето диетата. Меѓутоа, телото набргу ќе се врати во нормала и ќе се чувствувате енергични.

Пред да започнете со овој режим на исхрана прочитајте за 16-те можни опасности од кето диетата за кои треба да знаете.


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       


За авторот
Спиела во пустина, летала со параглајдер и видела 71-метарска статуа од Буда исклесана во планина. Со дигитално новинарство се занимава од факултетските денови.

Поврзани содржини

Остави коментар