4 совршени предјадења за секоја пригода

Автор: Маја Линкова

Не е лесно секогаш да можете да се сетите што да послужите како предјадење, додека се чека главниот оброк. Ова се 4 идеи за вкусни јадења во кои можете да уживате дури и многу повеќе од главниот оброк.

1. Јајца полнети со туна

1-4-sovrsheni-predjadenja-za-sekoja-prigoda-kafepauza.mk

Потребни состојки:
  • 6 јајца
  • 1 конзерва туна
  • 2 лажици мајонез
  • 1 лажица павлака
  • 3-4 кисели краставици
  • Сол и бибер
  • Магдонос
Начин на подготовка:

Сварете ги јајцата, излупете ги, расечете ги на половина по должина, отстранете ја жолчката и пасирајте ја со виљушка. Краставиците исечете ги на мали коцкички. Помешајте ја жолчката со мајонезот, павлаката, краставиците и зачините. Исцедете го маслото од туната и соединете ја целата смеса. Добро размешајте ја и оставете ја да се излади во фрижидер. Со шприц за готвење пополнете ги јајцата со смесата.

2. Пити со сирење

2-4-sovrsheni-predjadenja-za-sekoja-prigoda-kafepauza.mk

Потребни состојки:
  • 500 г тенки кори
  • 500 г кравјо сирење
  • 4 јајца
  • 150 г маргарин
  • 180 г павлака
  • 1 лажица сол
Начин на подготовка:

Изматете ги јајцата со миксер, додајте омекнат маргарин, сирење, павлака и сол и добро измешајте. Корите и смесата поделете ги на половина. На првата кора ставете две лажици од смесата и премачкајте ја. На неа ставете ја другата кора и исто така премачкајте ја со смесата. Продолжете така сè додека не ја истрошите половината од корите и смесата, па замотајте ја во ролат. Направете уште еден таков ролат, па со нож исечете ги на кружни парчиња со ширина на два прста. Поставете ги питите на мрсна хартија во тава и печете во рерна на 200 степени, околу 20 минути.

3. Проја со краставички

3-4-sovrsheni-predjadenja-za-sekoja-prigoda-kafepauza.mk

Потребни состојки:
  • 4 јајца
  • 2 шолји млеко
  • 1 шолја масло
  • 2 дл павлака
  • 2 шолји пченкарно брашно
  • ½ лажичка пециво
  • 4-5 кисели краставички
  • 150 г мешани сувомесни производи
  • 150 г биено сирење
  • Сол и бел бибер
Начин на подготовка:

Во голем сад изматете ги јајцата, посолете ги и додадете бибер. Додадете го пченкарното брашно помешано со пециво, потоа млекото, маслото и киселата павлака помешајте ги заедно. Со дрвена лажица полека помешајте го наренданото сирење, ситно исецканите кисели краставички и сувомеснатите производи. Истурете ја смесата во премачкана тава и печете ја во претходно загреана рерна, сè додека смесата не поцрвени.

4. Машнички со сланина

4-4-sovrsheni-predjadenja-za-sekoja-prigoda-kafepauza.mk

Потребни состојки:
  • 250 г лиснато тесто
  • 70 г тенко исечена сланина
  • 1 јајце
  • 50 г рендано сирење
Начин на подготовка:

Лиснатото тесто одмрзнете го на собна температура, и растегнете го во правоаголна форма, дебела три милиметри. На едната половина наредете ја сланината и покријте ја другата половина со тесто. Со остар нож исечете стапчиња, со должина и ширина по два и пол сантиметри. Премачкајте ги со јајце. Превртете ги стапчињата за да добиете форма на машна. Наредете ги на премачкана тава и посипете ги со рендано сирење. Печете ги во загреана рерна на 180 степени додека не поцрвенат.


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       

За авторот
Читај на раат!

Поврзани содржини

Остави коментар