Претходно
Куче дотерано во машка дизајнерска облека
Датум: 18 фев 2013
Коментари: 0
Не се случува често да наидете на толку добро облечено куче како ова, кое е подотерано од повеќето луѓе кои шетаат по улиците. Дури и ако не сте од оние луѓе, кои сметаат дека кучињата треба да се облекуваат, сепак ќе ви биде тешко да одолеете на големите кафени очиња на ова елегантно куче.
Боди спаѓа во расата шиба ину, има 3 и пол години и живее во Њујорк. Негова главна преокупација во текот на денот, е да биде главниот манекен на блогот за машка облека „Menswear Dog Blog“, нов портал кој нуди модни совети за мажи. Сопствениците на кучето Дејвид Фанг (28-годишен моден дизајнер) и неговата девојка Јена Ким (26-годишна графичка дизајнерка) ја добиле идејата во едно досадно саботно попладне. 
„Мислевме дека би било забавно да го дотераме нашето куче во убава машка облека, за да се посмееме. Но, откако објавивме една фотографија на Фејсбук и видовме колку неверојатен одѕив добивме од нашите пријатели и семејство, сфативме дека сме налетале на нешто неверојатно“. – објаснува Дејвид
Блогот е активен помалку од месец дена, но резултатите и одѕивот од посетителите се одлични. На почеток, Боди ја носи само облеката на Дејвид, но се надеваат дека во иднина ќе можат и да склучат договор со некоја модна марка. Дотерано со одлична брендирана машка облека која е во сопственост на Дејвид и разни аксесоари, мора да се признае дека ова куче навистина умее да позира и одлично да си ја работи својата манекенска работа. 
Одлична идеја за бизнис нели? Веќе си го замислив и слоганот на модната марка: „Облека која им стои добро на сите. Дури и на вашето куче.“ 🙂
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
