Претходно
Харизматични портрети на животни
Овие неверојатно харизматични портрети на животни се дело на фотографот Тим Флах. Тие се резултат на неговата намера да ги доведе луѓето во контакт со анималното во себе со тоа што самите животни ќе ги прикаже во човечко светло. Неговите модели од дивиот свет се фотографирани токму во момент кога прават некој специфичен потег со телото или имаат интересен израз на лицето. Затоа оваа серија е наречена „Повеќе од човек“.
Користејќи различни техники поврзани со светлото Флах успеал да создаде портрети за кои вели дека потсвесно го доближуваат гледачот до животните правејќи нивните мимики и гестови да ги споредуваат со оние на луѓето.
За да го постигне овој извонреден ефект на Флах му е потребен многу труд и трпение. Неопходно е прво да создаде амбиент во кој животното ќе биде опуштено и ќе му го даде на фотографот кадарот што тој го бара. Затоа Флах мора трпеливо да чека додека ја приспособува температурата во студиото или додека следи како животните реагираат на музиката која им ја пушта.
„Никогаш не можете да го предвидите однесувањето на животните, па затоа мора добро да планирате за да го добиете она што го сакате,“ вели тој.
Понекогаш, Флах со својот тим мораат да работат како да се тренери во циркус за да го добијат посакуваниот резултат, но судејќи според овие фотографии трудот добро им се исплати.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
