Станете попродуктивни: 15 минутно правило кое ќе ви го промени животот на подобро!

Станете попродуктивни: 15-минутно правило кое ќе ви го промени животот на подобро!

Четвртина час. Доволно за правење смуди, разговор со пријателка и најважно од сѐ, доволно време за промена на животот. Сите сонуваме да имаме уреден дом, да вежбаме минимум пет пати неделно и секое утро да готвиме, но времето воопшто не е на наша страна или пак ние не знаеме да го користиме? Според книгата „15 Minute Rule: How to stop procrastinating and take charge of your life“ од Каролин Бучанан, сите ги имаме тие 15 минути само треба да ги пронајдеме во нашите пребукирани распореди.

0-stanete-poproduktivni-15-minutno-pravilo-koe-kje-vi-go-promeni-zhivotot-na-podobro-kafepauza.mk

Прв ден: Престанете да одложувате, започнете да работите

Почетоците на нови нешта секогаш претставуваат голем предизвик. Мислите постојано ви пролетуваат на сите неодговорени мејлови, што има на Инстаграм и сл. Време е да заборавите на безделничењето и да се фокусирате на задачите пред вас.

Прво правило од книгата е да ги спречите збрканите мисли да ви се врткаат низ главата и едноставно да го направите нештото. Почнете од финансиите. Голем број луѓе не можат да заспијат навечер размислувајќи за своите долгови, кредитни картички и плаќање на сметките. Навидум сето тоа ви изгледа како многу напорно, па го оставате за „друг ден“, но тој никако да дојде.

Бучанан, од друга страна е непоколеблива: „Сите имаме теми кои не би сакале да ги започнеме, но важно е да се соочите со нив“ – посветете им 15 минути, со целосен фокус, без пречки и ќе успеете сѐ да завршите. Затоа притиснете старт и започнете да ги организирате финансиите. Откажете се од телефонот и интересните апликации што ги имате на него барем на 15 минути и работете концентрирано.

Втор ден: Промена на навиките

Факт е дека вежбањето ретко на кого му е омилена активност, но поради него сме здрави и се чувствуваме убаво потоа. Сепак, според овие правила дозволени се само кратки и брзи вежби – што значи високо интензивни кардио вежби т.е. комбинација од голем напор во мали временски интервали. Ова ќе ви ја зголеми кондицијата и ќе ви го зајакне метаболизмот.

Според професорот Џејми Тимонс од Универзитетот Лоубороу во Велика Британија, кратките и напорни вежби ги подобруваат аеробните способности и го намалуваат ризикот од дијабетес. Затоа, подгответе се и пробајте високо интензивен тренинг. Освен што ќе го подобрите здравјето, на овој начин ќе имате многу повеќе време за останатите активности од денот.

Трет ден: Промена во исхраната

Кога веќе ќе се уверите во моќта на 15-минутното правило, можете да почнете да го применувате и во други сфери од животот – исхраната. Сите сме склони кон вкусните, но сепак нездрави оброци. Според 15-минутното правило, во ред е да го изедете нештото само ако го посакувате повеќе од 15 минути. Вообичаено додека поминат тие кобни 15 минути, вие веќе ќе имате заборавено на храната. Ова е така затоа што е многу полесно да одолеете ако знаете дека нештото не ви е забрането.

Пробајте да готвите во рок од 15 минути. Најбрзо што можете одберете некој лесен рецепт, ставете престилка и откријте ги кулинарските тајни. Не го поминувајте времето ѕверејќи се во фрижидерот и прашувајќи се што да готвите. Носете брзи одлуки кои ќе ви го променат животот на подобро.

Четврти ден: Работете паметно

Со новиот пристап кој веќе го откривте, добро организирајте го времето и одредете по 15 минути за секој чекор од работата. Дајте си неколку минути одмор за да испиете кафе или да погледнете што има на Фејсбук, но потоа повторно вратете се на работа. Кога го мерите времето ќе бидете многу поефикасни, а нема ни да пропуштите ништо ново на социјалните мрежи.

Петти ден: Расчистување

Како и сите смртници на планетава, и вие сте мрзеливи да средите некој дел од вашиот живот, без разлика дали станува за простор или за некој проблем кој долго сте го одложувале. На пример, размислете како би изгледало кога би ја средиле градината. Убава глетка нели? Е па време е да се фатите за работа. Искористете ги тие 15-тина минути за барем малку да ја расчистите градината или некој друг дел од куќата. Доволни се само 15 минути дневно за да успеете сѐ да постигнете.

Како да го искористите 15-минутното правило денес:

Јавете се. Не трошете време на допишување на комплицирани теми. Наместо тоа, јавете се. Побрзо ќе го добиете одговорот и побрзо ќе можете да преминете на следната активност од денот.

Најдете време за себе. Одвојте еден период од денот за некој вид медитација или релаксација која ќе ве опушти и ќе ви даде енергија за да продолжите.

Испразнете ја торбата. Ослободете се од старите сметки, потрошените кармини и сите залутани работи кои буквално и психички ве влечат надолу. Потребни се само неколку минути за да го сторите сето ова, а чувството потоа е феноменално!


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       

За авторот
Живее за добра книга и дише преку пишаниот збор. Кога би можела, цел живот би патувала, би читала и би гледала филмови. Вљубеник во фотографијата и класиката. Оптимист и поборник за љубов. Модата е нејзиниот начин да го изрази своето мислење и став. Животот за неа е уметност, филозофија и добра храна.

Поврзани содржини

Остави коментар