Претходно
Модна инспирација: 5 начини на кои можете да носите молив здолниште
Постои едно парче облека кое може да нè спаси во последен момент. А тоа парче облека кое ние девојките апсолутно го обожаваме е молив здолништето. Најпрво, тоа е здолниште! А ретко која девојка не го сака ова парче облека. Како второ, тоа има совршен дизајн што одлично ја истакнува нашата фигура, а истовремено е погодно за сите стилови и прилики. Неговото купување е навистина рационално, а инвестицијата во него е супер паметна. Дали веќе го купивте вашето совршено молив здолниште? Доколку вашиот одговор е не, тогаш ви предложуваме да побрзате, а еве и неколку предлози во кои комбинации ова парче облека изгледа најдобро.
1. Бизнис комбинација
За жал, околу 80% од нашето време го поминуваме на работното место, но за среќа, тоа не е причина да се откажеме од тренди модните комбинации. Па така, молив здолништето лесно ќе можете да го понесете во вашите работни комбинации, заедно со тренди чевли со потпетица и елегантна, женствена кошула или сако. Ако додадете и впечатлив накит, тогаш вашиот бизнис изглед не само што ќе изгледа професионално, туку ќе биде и доста модерен.
2. Спортска девојка
Молив здолништето може да изгледа доста добро и со контрастни парчиња облека како што се на пример спортските дуксери. Здолништето е припиено, а дуксерот е широк, па добивате совршен и помалку неочекуван спој кој во комбинација со штикли и малку шминка овозможува тренди изглед со доза лежерност и удобност. Значи, две во едно!
3. Класично и елегантно
Секако, овој модел најдобро одговара во класичните, елегантни комбинации. Со други зборови, кога тој се наоѓа на својот терен. Одберете интересен модел на здолниште и комбинирајте го со отмена блуза, елегантни салонки и незаменлив црвен кармин. Дамски и со стил!
4. Едноставно и тренди
Понекогаш едноставните модни комбинации се најдобрите комбинации. Затоа ви предложуваме заедно со вашето молив здолниште да облечете едноставна бела кошула и дефинитивно ќе важите за девојка со стил. Докажано е дека со некои комбинации никогаш нема грешка, без разлика која и да е прилика во прашање. Сепак, доколку сакате да изгледате модерно, стилизирано и никако обично, тогаш вашето здолниште нека биде впечатливо – изберете некоја силна боја и направете ги тмурните есенски денови повесели и поубави.
5. Секси и модерно
Една од главните асоцијации на молив здолништето е секако секси изгледот. Односно, искористете го вашето омилено парче облека токму на ваков, секси начин. Комбинирајте го со краток топ со некој необичен крој и на целиот изглед додајте високи потпетици и вечерна шминка. Оваа комбинација е совршена за вечерно излегување и сјајна забава!
