5 антистрес вежби за прогресивно опуштање на мускулите што можете да ги правите и на работното место

Живееме во време кога ни е наметнато брзо темпо на живот, притисок и одговорност. Со зголемување на одговорноста и притисокот, градиме плодна основа за стрес, кој станува еден од најголемите проблеми на современиот човек. Токму затоа и треба да се знаат неколку практични вежби и совети што ќе ви помогнат да го подобрите квалитетот на животот и да се обидете да му пристапите на проблемот од друга перспектива.

5 антистрес вежби за прогресивно опуштање на мускулите што можете да ги правите и на работното место

Токму клиничкиот психолог, докторката Џесами Хиберд и новинарката Џо Асмар, во својата книга „Смиреност – како да ја стекнете“, го објаснуваат принципот за прогресивна релаксација на мускулите.

„Кога сме под стрес, нашите мускули природно се наоѓаат во состојба на напнатост, бидејќи мозокот ни е посветен на други нешта, па може да се случи воопшто и да не забележиме на телото. Со стегнување и опуштање на различни групи мускули на телото вие можете да создадете состојба на длабока релаксација, но истовремено и да ги прочистите вашите мисли, бидејќи ќе се сосредоточите на телото, а не на секојдневните маки и неволји. Кога следен пат ќе бидете напнати, вашето тело ќе го препознае тоа чувство (благодарение на мускулната меморија) и многу полесно ќе може да се смири“, објаснуваат Џесами Хиберд и Џо Асмар.

Во продолжение следуваат 5-те антистрес вежби за прогресивно опуштање на мускулите. За почеток, треба да седнете, а потоа да се обидете да го опуштите целото тело, од глава до петици. Еве како да го сторите тоа.

1. Задник и бутини

Истовремено затегнете ги мускулите на задникот и бутините. Задржете се што подолго можете во оваа позиција, а потоа целосно опуштете се, додека во себе си ги изговарате зборот „Пушти“. По пауза од 10-тина секунди, можете да ја повторите вежбата уште еднаш.

2. Стомак

Затегнете ги мускулите на стомакот и задржете се така најдолго што можете. Откако ќе се опуштите и ќе си ги изговорите во себе зборовите „Пушти“, направете пауза од 10-тина секунди и повторете ја вежбата уште еднаш.

3. Вилица

Стегнете ги виличните мускули така што ќе ги притиснете забите цврсто едни на други. Откако ќе се задржите така некое време, изговорете си го повторно зборчето „Пушти“ и паралелно опуштете ја вилицата. Почекајте 10-тина секунди и повторете.

4. Очи

Удобно наместете се и фокусирајте го погледот на некоја точка на плафонот. Немојте да ја поместувате главата и нежно свртете ги очите кон десно, па кон средина, кон лево и повторно кон средина. Откако ќе ги протриете дланките (додека не почувствувате топлина), затворете ги очите и прекријте ги со дланките со цел да ги згреете. Изговорете го зборот „Пушти“ во себе, тргнете ги дланките и опуштете ги очите.

5. Цело тело

За крај, постои една вежба што може да ви помогне да го ослободите и целото тело. Треба да најдете место каде што можете да легнете, на грб, целосно испружени. Потоа, згрчете ги стапалата и листовите, соберете ги рамената и затегнете ја вилицата заедно со лицето. Мрдајте со целото тело и обидете се да ги затегнете сите мускули, од глава до пети. Кога ќе почувствувате треперење на телото, изговорете го зборот „Пушти“, опуштете се целосно и ќе почувствувате инстантна леснотија.

Кога ќе завршите со вежбите, затворете ги очите и опуштете се. Доколку и понатаму чувствувате дека одредени делови на телото ви се напнати, слободно повторете некоја од вежбите.


За авторот
Дипломиран психолог кој обожава да пишува. Отсекогаш многу ја интересирала астрономијата и физиката, а животно мото ѝ е дека не смее да помине ни еден ден без танцување. Автор на книгата „На работ од времето“, првиот дел од трилогијата „Наследството на Вероника“.

Поврзани содржини

Остави коментар