Претходно
Зимска пладневна прошетка покрај Беровско Езеро
Датум: 06 јан 2013
Коментари: 0
Длабоко всадено во Малешевските Планини, на околу 1.000 метри надморска височина, Беровското Езеро е магично во секој период од годината, па и во зима. Имавме прилика да прошетаме во текот на едно убаво сончево зимско попладне, па ќе се обидеме да ви пренесеме дел од она што го доживеавме. Земете длабоко (планински) воздух и подготвени сте за прошетка.
Панорамска фотографија - кликнете за поголема верзија
Патеката покрај езерото нуди одлична можност за рекреативна или за романтична прошетка. Доколку патем сакате да одморите, искористете некоја од клупите на кои ќе наидете.
Панорамска фотографија - кликнете за поголема верзија
Дишите чист воздух, чекорите по подзакашавениот земјен пат, а од вашата лева страна (ако тргнете од горе) блескаат водите на Беровското Езеро одблеснувајќи ги дрвјата на кои и во овој период од годината не им недостига шареноликост. Планинскиот предел е сочинет од комбинација на листопадни и зимзелени дрвја, па есенските бои се комплетно пренесени и во зимската идила, барем додека не ги прекрие снег. 
Панорамска фотографија - кликнете за поголема верзија
Кога ќе се спуштите до браната, пред вас веќе има широка глетка. Застанете и одморете ги очите, изгубете се во блескавата вода или во високите дрвја кои гордо ја чуваат речиси од сите страни.
Панорамска фотографија - кликнете за поголема верзија
Панорамска фотографија - кликнете за поголема верзија
Во целиот предел има толку многу потенцијал, пред сè заради убавиот воздух и природа, но за жал малку од тоа е искористено. Шетајќи помеѓу дрвјата, ќе стигнете до дел со запуштени вили и куќарки, кои иако прекрасно се вклопуваат во природниот дизајн на пределот, сепак е жалосно да се видат ненаселени, макар од привремени гости за време на празниците.
Панорамска фотографија - кликнете за поголема верзија
Од неодамна, постојат добри услови за сместување на врвот на едно од ритчињата во комплексот Аурора, каде што празничната магија не само што е доловена, туку и природно вклопена во уникатниот амбиент.
Нека ни е на здравје прошетката!
Фотографиите се направени со Canon EOS 450D и iPhone 5. Не е дозволено нивно користење без дозвола.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
