Прекрасниот одговор на еден сопруг на прашањето: „Зарем не ти пречи нередот во домот?“

Пред неколку недели разговарав со мојата мајка преку телефон и во еден момент таа ме праша: „Зарем не ти пречи што Мел не го одржува домот чист?„ Беше сабота. Ги ставав садовите во машината за садови и искрено не знаев што да ѝ одговорам. Мојата мајка не го кажа тоа на негативен начин или слично. Нејзиниот мотив беше чиста љубопитност.

Очигледно забележала дека нашиот дом не е многу уреден. Не дека чистењето е само работа на Мел. Нашиот брак го гледам како партнерство, и чистењето е наша заедничка обврска. Признавам, честопати нашиот дом е затрупан со детски играчки, со нечисти садови, со половично завршени уметнички дела на пултот. Исто така, признавам дека нашиот дом не е чист како домот на мојата мајка, но тоа не ми пречи. Всушност, воопшто не ни размислувам за тоа.

Не знаев што да ѝ одговорам на мојата мајка, па се збунив. Никогаш не знам што да кажам во такви моменти. Но, кога ќе се вратам малку наназад, мислам дека начинот на кој мојата мајка го доживува нашиот дом всушност ги рефлектира времињата во кои таа израснала.

Таа припаѓа на многу поинаква генерација. Не го познавав најдобро мојот татко, но се сеќавам дека ми даде совет за тоа како да изберам сопруга: „Оди кај неа дома ненајавен. Погледни како изгледа. За жената можеш да дознаеш многу работи само од тоа колку го чисти домот.“ Мислам дека загриженоста на мојата мајка околу чистиот дом има голема врска со очекувањата што постоеле во нејзината младост.

Но, работата е во тоа што јас, за разлика од мојот татко, не размислував за чист дом кога се оженив. Размислував за тоа колку сакам да слушнам што има мојата сопруга да ми каже. Размислував за тоа како се чувствувам заради неа. Размислував за тоа како мојата сопруга многу се смее. Ми се допаѓаше тоа. Размислував за тоа колку е мила и внимателна и како ми се допаѓа за личност која би ја посакала да биде мајка на моите деца.

Откако неколку моменти се борев за да ги пронајдам вистинските зборови, конечно кажав: „Не влегов во овој брак заради чистотата на домот. Влегов во него, бидејќи таа ми изгледаше како некој со кого би можел да го поминам целиот живот.“

Тишина.

Ги ставив садовите во машината за садови. После некое време мајка ми рече: „Па, најверојатно тоа е поважно од чистотата на домот.“

„Да“, реков, „И јас го мислам тоа.“

САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?