Пивофест – Пиво, песна, позитива

Пивофест – Пиво, песна, позитива

Прилепскиот фестивал на пивото и скарата е забавна манифестација од отворен тип која веќе 14 години по ред ги собира љубителите на доброто пиво, скарата и музиката на едно место и ги обединува во духот на заедништвото. Во чест на 14-тото издание на пивскиот фестивал кој веќе го заслужува епитетот „традиционален” – Пивофест, откријте неколку интересни информации околу неговото одржување.

(1) Пивофест – Пиво, песна, позитива

Познат по масовната посетеност, големите музички имиња од матичната и странската естрада, како и присуството на дел од најуспешните производители на пиво од земјата и пошироко, овој фестивал уште од самите свои почетоци во 2003-тата година, успева да се издигне како збиднување кое се смета за симбол за позитивноста и несебичното гостопримство на македонскиот народ.

Достојно на карактеристиките на сите пивски фестивали од светски ранг, така и Пивофест брои низа рекорди кои не остануваат незабележани. Според статистичките податоци се наведува дека на фестивалот во 2007-мата година се испиле 250 тони пиво и се изеле 60 тони скара, додека највисокиот број на посетители низ годините достигнува 400.000.

(2) Пивофест – Пиво, песна, позитива

Како главни „виновници” за ваквата посетеност се големите балкански ѕвезди кои се задолжени за одржувањето на веселата и разиграна атмосфера. Меѓу нив се издвојуваат Здравко Чолиќ, Лепа Брена, Дино Мерлин, Жељко Самарџиќ, Горан Бреговиќ, Прљаво Казалиште и многу други.

Во организација на општината Прилеп и стопанските субјекти од градот, фестивалот вообичаено започнува во средината на месец јули и обезбедува 4-дневна забава која трае до раните утрински часови. По завршувањето на музичките настапи од официјалната програма, освен во локалните угостителски објекти, забавата продолжува и на т.н. алтернативна бина на која се претставуваат бројни македонски музички артисти од областа на електронската музика.

(5) Пивофест – Пиво, песна, позитива

Оваа година, фестивалот ќе започне во четврток, на 14-ти јули и ќе трае до 17-ти јули. Домашните и странските пивари веќе ги резервираа своите штандови и подготовките полека привршуваат. Во официјалната програма ќе настапат голем број музички изведувачи и тоа во четврток ќе ги погледнеме Кросроуд блуз бенд, Рафаел, Тропико бенд и романското дуо Флај Проџект; во петок ќе настапат Самостални референти, Каролина Гочева, Хари Мата Хари и Бенг ла Декс; во сабота – Миле Кузмановски, Рада Манојловиќ и Аца Лукас; и на финалната вечер, во недела, ќе настапат Александра Радовиќ, Дејан Петровиќ, Биг Бенд и популарната екс-ју група Парни Ваљак.

Повелете на пиво!


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       

За авторот
Новинар. Самопрогласен актер. Џедај. Животна форма еволуирана да живее од филмови, видеоигри, музика, хумор и технологија. Хоби и рекреација: Појадок, ручек, вечера.

Поврзани содржини

Остави коментар