Достоевски советува: Победете го злото околу вас и покорете го целиот свет

Доколку еднаш се одлучите за мир, вие ќе можете целиот свет да го покорите. Смирената љубов е огромна сила, од сите најсилна и ништо не може со неа да се мери. Секој ден, во секој момент, надгледувајте се самите себеси и обидувајте се вашиот изглед да биде благо убав.

Ете, сте поминале покрај мало дете, лути, со погрдни зборови, со злобна душа. И можеби не сте го ни забележале детето, но тоа ве видело, заедно со вашиот лик, грд и злобен, па може токму тоа останало во неговата слаба и незаштитена срж. Вие не го знаете тоа, но можеби на тој начин сте му фрлиле скапано семе во неговата душа, кое со тек на време ќе порасне само затоа што не сте се воздржале пред детето, бидејќи во себе не сте негувале внимателна и активна љубов.

Браќа и сестри, не се плашете од човечките гревови, сакајте го човекот дури и кога греши, бидејќи кога сакате грешен човек, тоа е најголемата слика на Божјата љубов и врвот на љубовта на земјата. Сакајте ги сите суштества, целосно, и со секој дел од вашата душа. Секој лист, секој зрак сакајте го. Сакајте ги животните, сакајте ги растенијата, сакајте ги сите нешта. Доколку сакате сè околу вас, вие ќе ја разберете Божјата тајна. И штом еднаш ќе ја разберете, потоа неуморно ќе почнете да ја спознавате сè подалеку и сè повеќе, секојдневно. И ќе го засакате целиот свет со целото ваше срце.

Сакајте ги и животните, бидејќи и ним Бог им дал мисли и тивка радост. Немојте да им го нарушувате животот, не ги мачете, не одземајте им ја радоста. Не мислете дека сте подобри од животните, тие се безгрешни, а вие со вашата величественост, вие само ја загадувате земјата, дури и со самата појава, оставајќи нечисти траги зад себе. Тоа го прави речиси секој, секој помеѓу нас!

Но, особено сакајте ги децата, бидејќи тие се безгрешни како ангели и живеат со цел да нè исполнат и усреќат. Тие живеат најмногу поради чистотата на нашите срца, како патокази во нашиот живот. Тешко оној кој ќе навреди дете.

САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?