Гуруто за нула отпад Беа Џонсон во Скопје: Како до една тегла ѓубре годишно?

Гуруто за нула отпад Беа Џонсон во Скопје: Како до една тегла ѓубре годишно?

Инициран од неформалната група на граѓан(к)и „Од нула до нула“, на 20 март (понеделник) во Скопје ќе се случи настанот „Беа Џонсон во Скопје: Како до една тегла ѓубре годишно?“. Осмислен како прва во низата активности коишто ќе имаат за цел да го доближат концептот „нула отпад“ до просечниот македонски потрошувач и да охрабрат негова практична примена во овдешниот контекст, настанот е составен од две предавања кои ќе ги одржи Беа Џонсон, една од најгласните поборнички за ослободување од стегите на консумеризмот и за (по)едноставно живеење.

1-guruto-za-nula-otpad-bea-dzhonson-vo-skopje-kako-do-edna-tegla-gjubre-godishno-kafepauza.mk

Оваа Французинка која живее во Калифорнија, денес ја сметаат за вистинско гуру за нула отпад! Има и зошто – од 2008 година наваму, таа успева, заедно со своето семејство, да произведе само една тегла ѓубре годишно! Преку својот веб-сајт и исклучително продаваната книга „Дом без ѓубре“ (Zero Waste Home), која досега е преведена на 14 јазици, таа отпочна глобално движење и неуморно ги инспирира луѓето низ светот да му се спротивстават на непотребниот отпад и така да живеат (по)едноставно.

Нејзиното начело гласи „речи не, редуцирај, реупотреби, рециклирај, компостирај, и тоа само по тој редослед“. Ги поткопува предрасудите, покажувајќи преку сопствениот пример дека живеењето без отпад не само што (може да бид)е живеење со стил, туку и носи значајни здравствени придобивки, како и заштеда во време и пари. За живеењето во духот на „нула отпад“ зборувала во бројни телевизиски емисии, како и на универзитети, корпоративни и TEDx настани и конференции низ целиот свет, вклучувајќи ги Гугл, Епл, Европскиот парламент и ООН.

2-guruto-za-nula-otpad-bea-dzhonson-vo-skopje-kako-do-edna-tegla-gjubre-godishno-kafepauza.mk3-guruto-za-nula-otpad-bea-dzhonson-vo-skopje-kako-do-edna-tegla-gjubre-godishno-kafepauza.mk

Нејзиното гостување во Македонија е во рамки на нејзината европска турнеја која се надоврзува на досегашните пет, односно на низата од над 150 говори во повеќе од 20 земји на пет континенти. Кај нас, таа ќе одржи две бесплатни предавања и тоа, на Универзитетот Американ Колеџ – Скопје во 16.00 часот и во „Јавна соба“ во 19.00 часот. Поради ограничениот број на места, пријавувањето е задолжително преку веб-сајтот odnuladonula.mk.

Предводена од „Од нула до нула“, организацијата на настанот ја помогнаа Друштвото за управување со отпад од пакување „Пакомак“, Асоцијацијата за развој на нови опции – АРНО, Здружението за креативно талкање „Самоник“ и креативниот колектив „Ококори“. Неопходната финансиска поддршка засега ја обезбедија колективниот постапувач со отпадни батерии, акумулатори, електричен и електронски отпад „Нула Отпад доо – Скопје“, првата овластена и лиценцирана компанија за собирање, транспортирање, складирање, третман и филтрирање на отпадните масла и масти за јадење од растително потекло „Суниленс“ и колективниот постапувач со електричен и електронски отпад „Екон Електрон“.

4-guruto-za-nula-otpad-bea-dzhonson-vo-skopje-kako-do-edna-tegla-gjubre-godishno-kafepauza.mk

Прифатен од сè повеќе луѓе како филозофија на живеење, концептот „нула отпад“ му пркоси на систематизираниот процес на произведување, консумирање и фрлање кој вртоглаво брзо ја задоволува и уште повеќе разгорува човечката ненаситност на сметка на човечкото достоинство, природните ресурси и животната средина. Живеењето со една тегла ѓубре годишно се чини како идеално решение за сеприсутното ѓубре кај нас, со чие намалување сигурно би се намалиле аларматното загадување на почвите, водите и воздухот и исклучително високите стапки на малигни и респираторни заболувања. Токму затоа, неформалната група на граѓан(к)и „Од нула до нула“ тргнува од нула за да стигне до нула отпад и заедно со партнерите да ја подигне свеста за отпадот како голем фактор на загадување и за улогата на поединецот во подобрувањето на квалитетот на животот и на животната средина.


САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?

       

За авторот
Читај на раат!

Поврзани содржини

Остави коментар