Огромен број луѓе насекаде во светот се обземени од магијата наречена „Покемон Гоу“. Играта во која со мобилни телефони се ловат Покемони се прошири со неверојатна брзина, а подеднакво ја прифаќаат и децата и возрасните. Додека порано Покемоните се ловеа без никаков физички напор, единствено со мрдање на палецот по екраните на мобилните телефони, „Покемон Гоу“ ги извади луѓето надвор.
Обожавателите на играта без трепнување одат во различни делови од градот во кој живеат, истрчуваат од автобусите, на сред пат ги оставаат автомобилите, не внимаваат на децата, ги фрлаат торбите од пазарување… Сè со цел да го уловат Покемонот кој ненадејно се појавил на нивниот екран. Токму затоа и ова т.н. Покемон лудило го привлече вниманието на експертите од различни области, на социолозите и психолозите.
AsapSCIENCE им дава еден предлог на оние кои излегле надвор од своите удобни фотелји, наместо на Покемоните, да обрнат поголемо внимание на природата во средината во којашто го бараат своето виртуелно пријателче. Да се сконцентрираат на необичните животни кои постојат со векови наназад, а за кои луѓето воопшто не се свесни дека живеат во нивна близина.
Погледнете го видеото, можеби некои од овие реални Покемони живеат во вашата поблиска или подалечна околина. Некои од тие животинки се неверојатни и ќе ве остават без зборови.
